سياسة الخصوصية

آخر تحديث: ١٤ أكتوبر ٢٠٢٦

١. من نحن

«كفو» تطبيق يساعدك تلتزم بالتمرين مع خوياك وفريقك. يديره محمد الدرساني («نحن»). لأي سؤال عن خصوصيتك تواصل معنا على support@getkafu.app.

٢. البيانات اللي نجمعها

• الحساب: إيميلك، لإرسال رمز الدخول.
• الملف الشخصي: اسمك الظاهر، وتاريخ ميلادك (للتأكد إن عمرك ١٨ أو أكثر، وما يظهر لأحد)، وجنسك (لأن الخويا والفرق من نفس الجنس فقط)، وهدفك ومستواك ووقت تمرينك وهدفك الأسبوعي واللغات اللي تتكلمها، ومدينتك ونادِيك إذا حبيت تضيفهم.
• التمارين: الصور اللي تلتقطها عند تسجيل التمرين، ووقت التسجيل.
• النشاط في التطبيق: خوياك وفريقك، و«كفو» اللي ترسلها وتستقبلها، والتحديات، ونقاطك، ورسائلك في المحادثات.
• الأمان: الأشخاص اللي حظرتهم، والبلاغات اللي ترسلها مع التفاصيل اللي تكتبها.
• الجهاز: رمز الإشعارات ولغة التطبيق، عشان نرسل لك الإشعارات.

ما نجمع: موقعك، أو جهات الاتصال، أو أي بيانات تتبّع أو إعلانات. وما نستخدم أدوات تحليلات خارجية.

٣. كيف نستخدم بياناتك

• تشغيل التطبيق: تسجيل الدخول، وحفظ تمارينك، وحساب الستريك والنقاط.
• اقتراح خويا وفرق تناسبك (نفس الجنس واللغة والهدف).
• مراجعة صور التمارين تلقائيًا عشان نمنع الصور غير اللائقة.
• حماية المستخدمين: مراجعة البلاغات، ومنع الإساءة.
• إرسال إشعارات عن خوياك وفريقك ورسائلك.

نعتمد على موافقتك عند التسجيل، وعلى حاجتنا لتقديم الخدمة اللي طلبتها.

٤. مين يشوف بياناتك

• خوياك وفريقك: اسمك، وتمارينك وصورها (بعد ما تنقبل)، ونقاطك، ورسائلك لهم.
• اللي يدوّرون على خويا: مستخدمين من نفس جنسك يشوفون اسمك وهدفك ومستواك ووقت تمرينك وهدفك الأسبوعي ولغاتك، ومدينتك ونادِيك إذا أضفتهم.
• ما يشوفها أحد: إيميلك وتاريخ ميلادك.
• اللي حظرته (أو حظرك) ما يشوف شي منك، وأنت ما تشوف شي منه.

٥. الشركات اللي تساعدنا

نستخدم مزوّدي خدمات يعالجون البيانات نيابةً عنا فقط، ولأغراض تشغيل التطبيق:

• Supabase: قاعدة البيانات وتسجيل الدخول وتخزين الصور. الخوادم موجودة في طوكيو، اليابان.
• Sightengine: فحص صور التمارين تلقائيًا. الصورة تنرسل لهم للفحص فقط.
• Expo وApple وGoogle: توصيل الإشعارات لجهازك.
• Resend: إرسال إيميل رمز الدخول.

بعض هذي الشركات تعالج البيانات خارج المملكة العربية السعودية. نختار مزوّدين يحمون البيانات بمعايير عالية، ولا نشارك إلا اللي يحتاجونه.

ما نبيع بياناتك لأي أحد. وقد نكشف البيانات إذا طلبتها جهة رسمية بموجب النظام.

٦. فحص الصور

كل صورة تمرين تنفحص تلقائيًا قبل ما يشوفها أحد. إذا كانت غير لائقة، تنحذف الصورة والتسجيل مباشرة. وقبل الفحص، الصورة يشوفها صاحبها فقط.

٧. كم نحتفظ ببياناتك

نحتفظ ببياناتك طول ما حسابك موجود. لما تحذف حسابك، نحذف ملفك وصورك وتمارينك ورسائلك وكل بياناتك. قد تبقى نسخ في النسخ الاحتياطية لفترة محدودة، ثم تنحذف تلقائيًا.

البلاغات: إذا انرسل بلاغ عن حساب، نحتفظ بالبلاغ واسم الحساب وإيميله وقتها حتى بعد حذف الحساب، لمدة سنتين، عشان نحمي المستخدمين ونمنع اللي يخالفون القواعد من الرجوع بحساب جديد. وإذا انحظر إيميل من كفو، نحتفظ فيه طول فترة الحظر.

٨. حقوقك

حسب نظام حماية البيانات الشخصية في المملكة، من حقك:

• تعرف كيف نستخدم بياناتك (هذي الصفحة).
• تطلب نسخة من بياناتك.
• تصحّح بياناتك، من «الإعدادات» ثم «تعديل الملف الشخصي».
• تحذف حسابك وبياناتك، من «الإعدادات» ثم «تعديل الملف الشخصي» ثم «حذف الحساب».
• تسحب موافقتك في أي وقت، بحذف حسابك.

لأي طلب، راسلنا على support@getkafu.app ونرد عليك خلال ٣٠ يوم.

٩. العمر

كفو للبالغين فقط (١٨ سنة أو أكثر). إذا عرفنا إن عندنا حساب لشخص أصغر، نحذفه.

١٠. حماية البيانات

البيانات مشفّرة أثناء النقل، والوصول لها محصور بقواعد صارمة: كل مستخدم يقدر يوصل لبياناته وبيانات خوياه وفريقه فقط. ومع ذلك، ما في نظام آمن ١٠٠٪.

١١. التغييرات

إذا غيّرنا هذي السياسة تغيير مهم، نعلمك داخل التطبيق قبل ما يصير ساري.